Sergio Carreira: "Fixemos todo o que puidemos" | OneFootball

Foto: EFE

O Celta non puido sumar puntos este domingo en Balaídos, onde caeu por 1-2 ante o Athletic Club nun encontro marcado pola esixencia física do rival e o desgaste acumulado dos celestes tras o seu esforzo en Copa do Rei. Sergio Carreira, un dos protagonistas do partido, analizaba así o encontro ao remate dos noventa minutos.

"Foi un partido complicado, son un rival moi físico, que esixen moito de nós. Penso que estivo parello por momentos, pero moi complicado vindo dun partido tan esixente en Copa. Malia a derrota, fixemos todo o que puidemos", sinalou o futbolista galego, destacando o esforzo do equipo a pesar do resultado adverso.

Carreira tamén valorou o feito de que o Celta tivese que afrontar este partido apenas unhas 60 horas despois de enfrontarse ao Real Madrid na Copa do Rei:"É complicado, non sei se foron 60 horas, pero foi complicado. Aínda así, non é unha escusa. Temos unha plantilla longa para competir dous partidos nese prazo de tempo".

O defensa celeste quixo tamén poñer en valor o papel dos canteiráns dentro do equipo, facendo mención especial a Yoel Rodríguez, que foi titular na portería celeste:"Sobre todo a defensa, con Yoel hoxe que estivo moi ben. É un pracer estar competindo xuntos por un mesmo obxectivo. Vense vendo dende o principio de tempada e nós e todo o mundo síntese orgulloso de que esteamos aquí".

Por último, Carreira tivo palabras de agradecemento para a afección celeste, que animou ao equipo nun día de choiva e cun horario pouco habitual:"Non fallan nunca. Hoxe era un día complicado polo horario, pola choiva, pero responderon sempre e estiveron con nós. Ese empuxe que nos deron case nos leva a empatar o partido".